Es Karambia Mudo Spesial Ala Anak Rantau

Es karambia mudo, iko lah jalaih tau dunsanak sadonyo ko, tapi ndak baa lah bia mimin agiah tau, kalau dirantau dunsanak es karambia mudo ko yo sangaik sangaik banyak nan suko, buliah dikatokan ughang nan mangalaih es karambia  ko mandapek sanak laris manis galeh nyo, because contoh nyo mimin shugang, mimin punyo kawan, karajo e laki bini hiduik dhagi manggaleh es karambia ko je nyo, hiduik juo kawan ko sampai kini bahkan alah hampia nak tigo buah lo ghumah e dighantau ko lai sanak, yo tekan awak diinyo es karambia mudo ko yo babuayo yeeh,,, sabantai lai naiak haji lo kawan ko lai,

Mimin sempat batanyo sahari bara buah habieh karambia, kok hari lai paneh, 300 buah ndak kama kapai kato kawan ko, bayangkan sajo lah sanak, kok dikampuang yo mungkin agak susah kito mangaleh es karambie mudo ko dek karano ughang dikampuang banyak nan punyo pokok karambia, kalau dikota ko sado e babali, mungkin lah rasaki e sanak hiduik dari manggaleh es karambia mudo ko.

Ok sanak ambo, mimin tunjuakan menu jo resep kawan ko punyo usaho, silahkan bagi dunsanak nan nio mancubo mambuek es karambia ko, silahkan dunsanak ambiak resep e dan pelajari caro caro mambuek e..

Proses : 10 menit
Lamo mambuek : 25 menit
Porsi : untuak 4 ughang

Bahan bahan 

• 2 buah karambia mudo segar
• 1 bks sari manih / biang gulo kalau tak adoh buliah pakai gulo haluih
• 20 gr vanille 
• 10 ml perisa pandan
• 250 gr batu es
• 2 buah limau samba potong 2 

Caro mambuek es karambia mudo

1. Langkah partamo, siapkan teko / cerek ukuran sedang, batuah karambia, masuak an aie e kadalam cerek, kamudian isi diserut pakai alat serut kalau ndak adoh alat serut pakai sendok juo buliah 
2. Salanjuik nyo, masuakan biang gulo kadalam cerek yang barisi aie jo karambia mudo lalu diaduak aduak bia bacampua raso e, tambahkan vanille jo perisa pandan, lalu aduak aduak baliak bia manyatu sempurna sadonyo
3. Langkah terakhir sadioan 5 buah galeh saji, masuakan aie karambia mudo yang alah jadi tadi kamudian tambahkan batu es, aduak aduk bia dingin lalu angiah limau samba buliah nak tambah segeh ghaso e.
4. Es kiambia mudo siap dihidangkan.

Betu chago mambuek e sanak, ndak payah gai do kan,, cubolah dunsanak buek dighumah nyo lain lo shego shego e kalau awak nan mambuek.. kehkehkeh,,, salamaik mancubo sanak ambo.